У лютым Беларусь заняла трэцяе месца ў ЕАЭС па дынаміцы цэн на сельгаспрадукцыю

9 красавіка, Позірк. Цэны на сельскагаспадарчую прадукцыю ў Еўразійскім эканамічным саюзе (ЕАЭС) у лютым 2025 года выраслі ў параўнанні са студзенем на 1% (у гадавым вымярэнні — на 10,3%), вынікае з праведзенага “Позіркам“ аналізу даных дэпартамента статыстыкі Еўразійскай эканамічнай камісіі (ЕЭК).

У Кыргызстане месячны рост склаў 5,7% (+12%), Расіі — 1,3% (+12,8%), Беларусі — 0,7% (+10,3%); у Казахстане цэны знізіліся на 1,4% (-4,2%), Арменіі — на 1,9% (+1,9%).

Прадукцыя раслінаводства ў сярэднім па ЕАЭС падаражэла на 2,1% (+14,5%): у Кыргызстане — на 8% (+11%), Расіі — на 2,4% (+18,8%), Беларусі і Казахстане — на 0,3% (+3,7% і -3,9% адпаведна); у Арменіі патаннела на 1% (+24,1%).

Цэны на прадукцыю жывёлагадоўлі ў цэлым па саюзе павялічыліся на 0,1% (+7,7%): у Кыргызстане — на 3,5% (+13,1%), Беларусі — на 0,8% (+12%), Расіі — на 0,4% (+8,5%); у Арменіі сталі меншымі на 2,1% (-2,5%), Казахстане — на 3,3% (-2,1%).

Па выніках студзеня — лютага 2025 года Беларусь заняла 4-е месца ў ЕАЭС па дынаміцы вытворчасці сельскагаспадарчай прадукцыі, сведчыць праведзенае “Позіркам“ параўнанне даных дэпартамента статыстыкі ЕЭК.

У цэлым па саюзе (без даных Арменіі) зафіксаваны рост на 1,8% (тут і далей у гадавым вымярэнні): у Казахстане — на 3,2%, Кыргызстане — на 2,1%, Расіі — на 1,7%, Беларусі — на 1,2%.

Пазыковая нагрузка арганізацый сельскай, лясной і рыбнай гаспадарак Беларусі на пачатак студзеня 2025 года складала 4 млрд 346,7 млн рублёў (+19,4% у гадавым вымярэнні), пратэрмінаваная — 35,6 млн (рост у 3,7 раза).