Літоўскія памежнікі перахапілі беспілотнік з 500 пачкамі беларускіх цыгарэт

4 красавіка, Позірк. Супрацоўнікі Службы аховы дзяржаўнай мяжы (САДМ) Літвы 2 красавіка прымусова пасадзілі беспілотны лятальны апарат, які пераносіў з тэрыторыі Беларусі партыю кантрабандных цыгарэт, паведамляе ведамства.

Устаноўлена, што “да чатырохвінтавога дрона была прымацавана ўпакоўка з 500 пачкамі цыгарэт Minsk Capital QS, маркіраваных беларускімі [акцызнымі] маркамі”.

Сёлета, паводле звестак САДМ, выкарыстоўваючы абсталяванне для барацьбы з дронамі, літоўскія памежнікі перахапілі 18 беспілотнікаў з цыгарэтамі з Беларусі (за ўвесь 2024-ы — 54.). Папярэдні выпадак быў зафіксаваны 28 сакавіка.

У апошні час фіксуецца ўсё больш спроб перапраўкі кантрабандных грузаў з Беларусі ў Літву паветрам. У пачатку сакавіка літоўская памежная служба паведаміла, што з пачатку года перахоплена 99 партый кантрабандных цыгарэт, дастаўленых з Беларусі з дапамогай паветраных шароў (за ўвесь 2024 год — 226, 2023-і — тры, 2022-і — ніводнай).