4 красавіка, Позірк. Новы ўказ пра наданне дзяржаўнай падтрымкі арганізацыям фізічнай культуры і спорту плануецца распрацаваць да 1 ліпеня, чакаецца, што дакумент набудзе моц з 1 студзеня 2026 года, заявіў міністр спорту і турызму Сяргей Кавальчук 4 красавіка па выніках нарады ў Аляксандра Лукашэнкі.
Паводле кіраўніка ведамства, якога цытуюць дзяржСМІ, на нарадзе былі падтрыманыя ўсе прапановы Мінспорту па “ўдасканаленні сістэмы падтрымкі ў спорце”. “Чарнавы” варыянт дакумента, паводле слоў Кавальчука, ужо гатовы.
Папярэдні ўказ (№ 191) аб дзяржпадтрымцы спорту быў прыняты ў 2013 годзе, прыйшоў час “змяніць падыходы”, адзначыў чыноўнік. “Павінна быць справядлівае, рацыянальнае, эфектыўнае размеркаванне ўкладзеных сродкаў. Мы павінны кожную капейку лічыць”, — удакладніў ён.
Адной з задач у спорце Кавальчук назваў стварэнне “правільнай сістэмы кантролю”, каб бачыць, “як і на што выдаткоўваюцца сродкі”.
Паводле яго слоў, урад, Мінспорту, Нацыянальны алімпійскі камітэт павінны ў бліжэйшы час “выпрацаваць і дапрацаваць гэтыя падыходы”.
Лукашэнка на нарадзе падкрэсліў “нязменны падыход”, паведамляе яго прэс-служба. “Даяце вынік — атрымліваеце грошы, і перш за ўсё годны заробак. Няма выніку — няма грошай. Вось галоўная формула”, — адзначыў ён.
Паводле яго сцвярджэння, спорт “атрымліваў і будзе атрымліваць” неабходную падтрымку, але “кожны ўкладзены рубель, нават калі іх і няшмат, павінен быць апраўданы і даваць аддачу”.
“Маё патрабаванне: не будзе гэтага — не будзе грошай. Я хачу, каб прэм’ер чуў і міністр фінансаў — не будзе ніякіх грошай, калі не будзе прагрэсу”, — цытуе Лукашэнку яго прэс-служба.
29 лютага 2024 года, заслухаўшы даклад аб развіцці беларускага футбола, ён заявіў: “Увогуле, калі ацэньваць нашыя спартыўныя дасягненні, яны нічога не вартыя”.
“Сорамна глядзець. Часам агідна. Такі спорт народу не патрэбны. І з бюджэту ніхто гэта фінансаваць не будзе. Пра футбол я баюся нават гаварыць. Мы некаторыя каманды з суседніх дзяржаў раней у футболе проста не заўважалі. А зараз?! Але што мяне абурае: аказваецца, новы кіраўнік федэрацыі з міністрам спорту нешта не падзялілі. Яны не могуць працаваць адзін з адным. Цуды! Ды там жа дзяліць няма чаго!” — сказаў Лукашэнка.
Пасля падзей 2020 года і пачатку вайны ва Украіне супраць беларускага, як і расійскага, спорту былі ўведзены санкцыі. У выніку ў Беларусі сёння практычна не праводзяцца міжнародныя спаборніцтвы, айчынныя атлеты пазбаўлены магчымасці выступаць на многіх буйных турнірах за межамі краіны.
