Сейм Польшчы: Вынікі выбараў у Беларусі не адлюстроўваюць волю народа
4 красавіка, Позірк. Прэзідэнцкія выбары ў Беларусі, якія адбыліся 26 студзеня, не адпавядалі дэмакратычным стандартам, іх вынік не можа лічыцца сапраўдным адлюстраваннем волі беларускага народа.
Вытрымкі з дакумента са спасылкай на агенцтва РАР публікуе партал мясцовага самакіравання Польшчы.
За прыняцце рэзалюцыі выказаўся 431 дэпутат, супраць — два, тых, хто ўстрымаўся, не было.
Сейм, “кіруючыся асноватворнымі прынцыпамі дэмакратыі і павагі правоў чалавека і грамадзянскіх свабод, выказвае глыбокую занепакоенасць палітычнай сітуацыяй у Беларусі”.
Падкрэслена, што ніжняя палата “з абурэннем успрыняла рашэнне беларускіх уладаў не дапускаць прадстаўнікоў Бюро па дэмакратычных інстытутах і правах чалавека АБСЕ да назірання за выбарчым працэсам з дастатковым [па часе] апавяшчэннем, што яшчэ больш падрывае яго надзейнасць і празрыстасць”.
“Сейм Рэспублікі Польшча рашуча выступае супраць дзеянняў, якія абмяжоўваюць асноўныя правы і грамадзянскія свабоды беларускага грамадства, у тым ліку рэпрэсій у дачыненні да прадстаўнікоў апазіцыі, незалежных журналістаў і арганізацый грамадзянскай супольнасці, а таксама прадстаўнікоў польскай меншасці ў Беларусі, у тым ліку Анджэя Пачобута, які ўжо шмат гадоў знаходзіцца ў зняволенні”, — падкрэсліваецца ў дакументе.
“Сейм Рэспублікі Польшча таксама ўскладае адказнасць за гэты зацяжны крызіс дэмакратыі, невыкананне правоў чалавека і грамадзяніна, пастаянныя рэпрэсіі ў дачыненні да беларускага грамадства на Расійскую Федэрацыю, якая фактычна пазбавіла беларускую дзяржаву суверэнітэту ў працэсе гвалтоўнай інтэграцыі з дзяржавай”, — гаворыцца ў рэзалюцыі.
Намеснік старшыні Аб’яднанага пераходнага кабінета, кіраўнік Народнага антыкрызіснага ўпраўлення (НАУ) Павел Латушка, які прысутнічаў на пасяджэнні Сейма 4 красавіка, адзначыў у сваім тэлеграм-канале, што адным з найважнейшых пунктаў рэзалюцыі стала прызнанне “свабоднай і суверэннай Беларусі як аднаго з ключавых слупоў стабільнасці”.
Паводле яго, “польскія дэпутаты выказалі падтрымку дзейнасці беларускіх дэмакратычных сіл у выгнанні, якія працягваюць змагацца за пабудову свабоднай і дэмакратычнай Беларусі ў еўрапейскай сям’і”.
Кіраўнік НАУ таксама адзначыў, што дэпутаты “звярнуліся да польскага ўрада з заклікам зрабіць далейшыя крокі па падтрымцы беларускага грамадства, а таксама выказалі сваю падтрымку актыўнаму прымяненню міжнародных санкцый супраць тых, хто нясе адказнасць за парушэнні правоў чалавека і задушэнне свабоды ў Беларусі”.
Першапачаткова прыняць рэзалюцыю планавалася 20 сакавіка, аднак, паводле інфармацыі крыніц “Позірку”, было перанесена пасля разгляду паправак камісіяй па замежных справах.
Кіраўнік Сената Польшчы: мы выбары ў Беларусі не прызнаём (дапоўнена)
9 студзеня, Позірк. "Псеўдавыбарамі" назвала прэзідэнцкую выбарчую кампанію ў Беларусі кіраўнік Сената Польшчы Малгажата Кідава-Блоньска на брыфінгу па выніках сустрэчы з дэмлідарам Святланай Ціханоўскай 9 студзеня ў Варшаве. "Мы абавязаліся, што тут з польскага Сената будзе вельмі моцны сігнал і …