Польшча абвінаваціла Беларусь у кібератацы на інфармацыйныя сістэмы партыі прэм’ер-міністра Туска

3 красавіка, Позірк. “Групы з Расійскай Федэрацыі і Беларусі” ажыццявілі кібератаку на інфармацыйныя сістэмы партыі “Грамадзянская платформа”, заявіў 3 красавіка віцэ-прэм’ер, міністр цыфравізацыі Польшчы Кшыштаф Гаўкоўскі.

Паводле яго слоў, якія перадае RMF24, атака была арганізаванай і спланаванай, польскі бок ставіцца да гэтага “вельмі сур’ёзна”.

“Падобны інцыдэнт, можа закрануць любую палітычную партыю, любы дзяржаўны інстытут”, — сказаў віцэ-прэм’ер, дадаўшы, што “Расія хоча скрасці выбары ў Польшчы і палякаў”, але “ёй гэта не ўдасца”.

2 красавіка польскі прэм’ер-міністр Дональд Туск заявіў, што інфармацыйная сістэма “Грамадзянскай платформы” стала аб’ектам кібератакі. “Замежнае ўмяшанне ў выбары пачалося. Службы паказваюць на ўсходні след”, — адзначыў ён.

Пазней польскія СМІ паведамілі, што інфармацыя, атрыманая ад упаўнаважаных органаў, якія займаюцца пытаннямі бяспекі і кібербяспекі, сведчыць аб кібератацы на кампутары супрацоўнікаў офіса “Грамадзянскай платформы” і выбарчага штаба.

Прэзідэнцкія выбары ў Польшчы пройдуць 18 траўня 2025 года. Фаварытамі ў гонцы з’яўляюцца мэр Варшавы, прадстаўнік “Грамадзянскай платформы” Рафал Тшаскоўскі, беспартыйны Караль Наўроцкі, падтрыманы апазіцыйнай партыяй “Закон і справядлівасць” (PiS), і лідар ультраправай кааліцыі “Канфедэрацыя свабоды і незалежнасці” Славамір Ментцэн.