1 красавіка, Позірк. Супрацоўнікі УУС Мінскага аблвыканкама пры сілавой падтрымцы АМАПа затрымалі 43-гадовага мінчука, які пазіцыянаваў сябе як “злодзей у законе”, паведаміла МУС 1 красавіка.
Адзначаецца, што Павел Алексеевіч (крымінальная мянушка “Паштэт”) разам з 43-гадовым саўдзельнікам, які таксама быў затрыманы, “займаўся вывадам сродкаў, заведама здабытых злачынным шляхам”.
Паводле звестак следства, “Алексеевіч звязаўся з прадстаўнікамі махлярскага ўкраінскага кол-цэнтра і, карыстаючыся статусам “крымінальнага аўтарытэта”, прапанаваў супрацоўніцтва: “На працягу паўгода ён з падзельнікам пераводзілі сродкі, атрыманыя ад ахвяр аферыстаў, у крыптавалюту і перадавалі заказчыкам на электронных носьбітах пры асабістых сустрэчах у Мінску. За свае паслугі яны бралі 27% ад сумы”.
“Грамадзян Беларусі (пераважна пажылых) падманвалі ад імя праваахоўнікаў і прадстаўнікоў аператараў сотавай сувязі. Дакладна вядома як мінімум пра 57 эпізодаў на суму больш за 370 тысяч рублёў”, — адзначыла ведамства і дадало, што “падчас вобыскаў у затрыманых канфіскаваны грошы і маёмасць, якія будуць выкарыстаныя для пакрыцця шкоды, нанесенай пацярпелым”.
“Следчымі распачата крымінальная справа за махлярства. Абодва фігуранты раней неаднаразова судзімыя”, — гаворыцца ў рэлізе.
Павел Алексеевіч выйшаў на волю ў кастрычніку 2024 года, паведамляў Udf.name са спасылкай на сайт “Прайм Крайм”, які спецыялізуецца на крымінальнай тэматыцы. Агулам яго турэмны стаж ужо дасягнуў 20 гадоў, ён быў судзімы шэсць разоў.
Аўтарызавацца
Забыліся пароль?
Выхад з профілю
