Расія зноў перанесла тэрміны выплаты беларускага доўгу на суму 800 млн долараў
20 сакавіка, Позірк. Масква ў чарговы раз перанесла тэрміны выплаты асноўнага беларускага доўгу на суму 800 млн долараў, вынікае з дакументаў, апублікаваных на афіцыйным прававым інтэрнэт-партале Расіі.
Гаворка пра перыяд выплаты доўгу з 1 красавіка па 31 снежня 2024 года, працэнтаў — з 1 ліпеня па 31 снежня 2024-га. Тэрміны перанесеныя на перыяд 2031–2036 гадоў.
Прэзідэнт РФ Уладзімір Пуцін падпісаў 20 сакавіка закон “Аб ратыфікацыі Пагаднення паміж Урадам Расійскай Федэрацыі і Урадам Рэспублікі Беларусь аб змене ўмоў асобных расійска-беларускіх міжурадавых пагадненняў і Пратакола аб унясенні змяненняў у Пагадненне паміж Урадам Расійскай Федэрацыі і Урадам Рэспублікі Беларусь аб змене ўмоў асобных расійска-беларускіх міжурадавых пагадненняў ад 25 красавіка 2024 г.”.
4 сакавіка закон быў ухвалены Дзярждумай Расіі, 14 сакавіка яго прыняла верхняя палата расійскага парламента — Савет Федэрацыі.
Згаданае пагадненне паміж урадамі Беларусі і РФ было падпісана ў Маскве 25 красавіка 2024 года, пратакол за 11 ліпеня 2024 года ўнёс у пагадненне змены.
Пра перанос выплат 800 млн долараў раней паведамляў ТАСС намеснік міністра фінансаў Расіі Уладзімір Колычаў. Паводле яго слоў, пагадненне і пратакол былі падпісаны ў 2024 годзе ў мэтах зніжэння плацежнай нагрузкі на бюджэт Беларусі.
У снежні 2023 года Пуцін падпісаў закон аб ратыфікацыі аналагічнага міжурадавага пагаднення з Беларуссю “аб змене ўмоў асобных расійска-беларускіх міжурадавых пагадненняў” аб пераносе выплат па абавязку”.
Расія ідзе насустрач Беларусі ў частцы пагашэння яе дзярждоўгу, паведаміў 4 лютага 2024-га ў эфіры тэлеканала “Беларусь 1” у той час амбасадар у РФ Дзмітрый Круты (цяпер кіраўнік адміністрацыі Аляксандра Лукашэнкі).
Паводле яго слоў, Расія “чуе ўсе прапановы” Беларусі: “Мінфінансаў (імаверна, Расіі. — “Позірк“.) выпрацоўвае стратэгію працы з доўгам і працэнтамі на 2024–2026 гады для таго, каб дзярждоўг не ціснуў на бюджэт Беларусі. Каб мы маглі накіроўваць сродкі на інвестыцыйныя праекты, падтрымліваць праекты ў Беларусі і захоўваць на бяспечным узроўні золатавалютныя рэзервы”.
Раней паведамлялася, што валавы замежны доўг Беларусі за студзень — верасень 2023 года скараціўся на 3,133 млрд долараў (7,9%) — да 36 млрд 661,9 млн на 1 кастрычніка 2023 года.
Знешні дзяржаўны доўг Беларусі 1 кастрычніка 2022 года складаў больш за 41 млрд 515,2 млн долараў, сведчаць даныя Дэпартамента статыстыкі Еўразійскай эканамічнай камісіі (ЕЭК), апублікаваныя 25 студзеня. Пасля гэтага беларускія ўлады засакрэцілі звесткі аб дзяржаўнай запазычанасці. Апошні раз Міністэрства фінансаў публікавала іх па выніках першага паўгоддзя 2022-га.
Паводле інфармацыі Сусветнага банка, у 2022 годзе найбуйнейшым крэдыторам Беларусі была Расія. Запазычанасць перад ёй дасягнула амаль 8,24 млрд долараў.
