Ціханоўская: Інаўгурацыя без выбараў — пустая фармальнасць (дапоўнена)

20 сакавіка, Позірк. “Інаўгурацыя без выбараў — пустая фармальнасць, яна не зробіць Лукашэнку легітымным”, — заявіла “Позірку” Святлана Ціханоўская, каментуючы паведамленні пра прызначэнне інаугурацыі Аляксандра Лукашэнкі на 25 сакавіка.

“Яго не прызнаюць ні беларусы, ні міжнародная супольнасць, — падкрэсліла дэмакратычны лідар. — Яго рэжым працягвае трымацца выключна на рэпрэсіях, страху і падтрымцы Крамля, прадаючы суверэнітэт нашай краіны у абмен на падтрымку сваёй незаконнай улады”.

Ціханоўская адзначыла, што 25 сакавіка беларусы па ўсім свеце выйдуць на акцыі з нагоды Дня Волі (107-я гадавіна абвяшчэння Беларускай Народнай Рэспублікі). “Гэта свята нашай незалежнасці і нашага супраціву дыктатуры. Мы скажам гучна, што Лукашэнка — не прэзыдэнт, ён злачынец, які захапіў уладу. Мы нагадаем свету пра нашых палітвязняў і нашу барацьбу. Беларусь абавязкова будзе вольнай”, — падкрэсліла дэмлідар.

Дапаўненне. У сацыяльнай сетцы Х (“Твітар”) Ціханоўская з нагоды інаўгурацыі адзначыла, што Лукашэнка “прадае Беларусь Пуціну, цягне нашу краіну далей у акупацыю”. Яна заклікала далучацца да Міжнароднага дня салідарнасці з Беларуссю. “Ад Лос-Анджэлеса да Кіева на мітынгах і мерапрыемствах будзе гучаць адна ідэя: Беларусь будзе свабоднай! Свабоднай ад тыраніі, свабоднай ад расійскага кантролю, якая вярнулася ў Еўропу, дзе ёй і месца”, — падкрэсліла палітык.

Гл. па тэме:

Лукашэнка запланаваў сваю сёмую інаўгурацыю на 25 сакавіка (дапоўнена)