За мінулыя суткі агонь забраў яшчэ адно жыццё, але ў статыстыцы МНС колькасць ахвяр пажараў скарацілася

15 сакавіка, Позірк. За мінулыя дзяжурныя суткі (з 6:00 14 сакавіка да 6:00 15 сакавіка) ад агню ў Беларусі загінуў адзін чалавек, сведчаць даныя Міністэрства па надзвычайных сітуацыях.

Трагічны выпадак здарыўся ў Шклоўскім раёне (Магілёўская вобласць).

Паводле звестак МНС, з пачатку года ў Беларусі адбылося 1.629 пажараў — на 37,1% больш, чым за аналагічны перыяд 2024-га (1.164). Загінула 189 чалавек (+36%; 139).

Адметна, што ў табліцы даных, апублікаваных ведамствам 14 сакавіка, значылася 190 загінулых з пачатку года. Гэта ўжо не першы выпадак, калі МНС карэктуе даныя па смяротнасці на пажарах у бок заніжэння.

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост [колькасці загінулых]”, — сказаў ён.

Асноўная прычына, з якой павялічваецца колькасць пажараў, — неасцярожнае абыходжанне з агнём, у першую чаргу звязанае з курэннем у стане алкагольнага ап’янення, адзначыў прадстаўнік МНС.

“Сёння мы рэалізуем дастаткова дакладны, адрасны, на падставе сур’ёзнага аналізу комплекс прафілактычных мер, — паведаміў Бараноўскі. — І мы бачым партрэт групы рызыкі. Мы ўсе цудоўна ведаем, што пажары ў асноўным адбываюцца ў начны час сутак, ахвярамі агню становяцца людзі, якія вядуць асацыяльны лад жыцця. Гэта састарэлыя людзі, якія самотна пражываюць, пенсіянеры, інваліды”.

“Сёння на дзяржаўным узроўні, у рамках працы ўсіх зацікаўленых суб’ектаў прафілактыкі (не толькі МНС) <…> робіцца ўсё для таго, каб стабілізаваць гэтую абстаноўку, але разам з тым праблема існуе”, — заявіў ён.