12 сакавіка, Позірк. У міждзяржаўны вышук абвешчаны намеснік старшыні Беларускай асацыяцыі журналістаў (БАЖ) Алег Агееў, паведамілі ў арганізацыі.
На падставе якога артыкула адшукваецца медыяменеджар, у вышуковай базе не пазначана.
На думку Агеева, беларускія ўлады маглі зрабіць запыт на яго імя ў Інтэрпол.
Ён дапускае, што ў Беларусі ў дачыненні да яго распачатая крымінальная справа. “Але ніякіх паведамленняў з гэтай нагоды я асабіста не атрымліваў. Наўрад ці мяне падавалі ў вышук як зніклага, гэта не мой выпадак”, — адзначыў Агееў.
28 студзеня стала вядома, што ў міждзяржаўны вышук абвешчаны іншы намеснік старшыні БАЖ — Барыс Гарэцкі. Падрабязнасці таксама невядомыя.
Агееў і Гарэцкі з’яўляюцца намеснікамі старшыні БАЖ з 2018 года.
27 жніўня 2021 года Вярхоўны суд ліквідаваў БАЖ на падставе пазову Міністэрства юстыцыі, арганізацыя працягнула дзейнасць за мяжой.
28 лютага 2023 года КДБ прызнаў яе “экстрэмісцкім фарміраваннем”, палічыўшы, што “экстрэмісцкую дзейнасць” ажыццяўляюць у прыватнасці старшыня Андрэй Бастунец, яго намеснікі Барыс Гарэцкі, Алег Агееў, Аляксандр Старыкевіч, член праўлення Аліна Суравец, кіраўнік інфармацыйнай службы Вольга Хвоін, а таксама члены арганізацыі Зоя Лукашук і Сяргей Комлач.
5 чэрвеня 2023 года суд Цэнтральнага раёна Мінска прызнаў “экстрэмісцкімі матэрыяламі” кантэнт асноўнага і рэзервовага сайтаў Беларускай асацыяцыі журналістаў (baj.by і baj.life адпаведна). Адпаведны статус атрымаў змест тэлеграм-канала БАЖ, старонак у “Інстаграме”, “Фэйсбуку”, “Твітары”, а таксама лагатып арганізацыі.
