Колькасць расійскіх турыстаў у Беларусі вырасла за год на траціну

12 сакавіка, Позірк. У 2024 годзе назіраўся “рэзкі рост турыстычнага патоку з Расіі ў Беларусь”, ён павялічыўся на 32% у параўнанні з 2023-м, вынікае з аналізу профільнага онлайн-сэрвісу РФ “Туту”.

Найбольш запатрабаванымі напрамкамі для падарожнікаў з Расіі названыя Мінск, Брэст, Гродна, Гомель і Віцебск.

Самым папулярным горадам “для размяшчэння” называецца Мінск, які выбіраюць амаль 84% расіян. “Эксперты рэкамендуюць правесці ў сталіцы Беларусі як мінімум тры дні, пачаўшы з агляду цэнтра горада і плошчы Свабоды. Звярніце ўвагу на адноўленую ратушу і сабор Найсвяцейшай Панны Марыі, вядомы сваёй архітэктурнай прыгажосцю”, — адзначае сайт “Рэгіёны Расіі”.

Брэст прыцягнуў увагу каля 7% турыстаў, дзе расіянам цікавыя Брэсцкая крэпасць, а таксама “прыродныя прыгажосці Белавежскай пушчы”.

У Гродна накіроўвалася 3% падарожнікаў. Карыстаюцца попытам Стары замак і праваслаўная Каложская царква.

Гомель цікавы “прыгожымі паркамі і архітэктурнымі ансамблямі”, а Віцебск, як радзіма мастака Марка Шагала, — “унікальнымі культурнымі славутасцямі”.

“Беларусь становіцца ўсё больш прывабнай для расійскіх турыстаў дзякуючы даступнасці і прымальным цэнах, — падкрэсліла эксперт “Туту” Яўгенія Андрыянава. — Для наведвання краіны расіянам патрэбны толькі пашпарт, а кошты на жыллё і паслугі ніжэйшыя, чым у буйных гарадах Расіі. Акрамя таго, узаемадзеянне паміж дзвюма краінамі паляпшаецца: прынятыя карты “Мір” і адмена роўмінгу абяцаюць зрабіць паездкі яшчэ больш зручнымі”.

Паводле даных Нацыянальнага статыстычнага камітэта, у 2024 годзе ў Беларусі дзейнічала 618 гасцініц і аналагічных сродкаў размяшчэння, іх паслугамі скарысталася 2,5 млн чалавек, з іх 1,2 млн — замежнікі.

У 478 санаторна-курортных, аздараўленчых арганізацыях было абслужана 218 тыс. грамадзян замежных краін, а аграсядзібах — 14 тыс.