Экс-кіраўнік МУС і памочнік Лукашэнкі Караеў прызначаны в.а. старшыні Гродзенскага аблвыканкама

3 сакавіка, Позірк. Былога міністра ўнутраных спраў, а пазней інспектара па Гродзенскай вобласці (памочніка прэзідэнта) Юрыя Караева на пасаду выконваючага абавязкі старшыні Гродзенскага аблвыканкама прызначыў 3 сакавіка Аляксандр Лукашэнка.

“Перадаць пасаду” Караеву, як вынікае з апублікаванага ў неафіцыйным канале прэс-службы Лукашэнкі відэа, палітык прапанаваў прызначанаму ў гэты ж дзень намеснікам прэм’ер-міністра Уладзіміру Караніку (займаў пасаду старшыні аблвыканкама). Ад яго Лукашэнка чакае таксама “кантролю над вобласцю” і дапамогі Караеву.

Кіраўніку сваёй адміністрацыі Дзмітрыю Крутому Лукашэнка даручыў падрыхтаваць указ аб прызначэнні Караева на пасаду кіраўніка рэгіёна.

Караеў нарадзіўся ў Паўночнай Асеціі (цяпер Расія), у Беларусі застаўся пасля службы ў войску ў 80-х гадах мінулага стагоддзі.

Як адказны за рэпрэсіі 2020 года ўключаны ў санкцыйныя спісы ЕС, ЗША, Вялікабрытаніі, Канады, Швейцарыі, Албаніі, Ісландыі, Ліхтэнштэйна, Нарвегіі, Паўночнай Македоніі, Чарнагорыі, Украіны.

Займаў пасаду міністра ўнутраных спраў Беларусі з 11 чэрвеня 2019 па 29 кастрычніка 2020 года, з 29 кастрычніка 2020 года — памочнік Лукашэнкі-інспектар па Гродзенскай вобласці.

Каранік быў прызначаны старшынёй Гродзенскага аблвыканкама 22 жніўня 2020 года, калі ў краіне, у тым ліку ў яго родным Гродне, праходзілі масавыя акцыі пратэсту супраць фальсіфікацыі прэзідэнцкіх выбараў і праяўленай сілавікамі жорсткасці ў адносінах да дэманстрантаў.

Да гэтага крыху больш за год (з чэрвеня 2019-га) ён займаў пасаду міністра аховы здароўя, на якую перайшоў з пасады галоўнага ўрача Мінскага гарадскога клінічнага анкалагічнага дыспансера.