Рассельгаснагляд не прапусціў 400 кг ласосевых з Беларусі, іх везлі без халадзільніка

26 лютага, Позірк. Супрацоўнікі Паўночна-Заходняга ўпраўлення Федэральнай службы па ветэрынарным і фітасанітарным наглядзе (Рассельгаснагляд) не прапусцілі на тэрыторыю РФ партыю рыбы ласосевых парод агульнай вагой каля 400 кілаграмаў, якая ішла з Беларусі.

Паводле інфармацыі прэс-службы ведамства, перавозчык не змог прадаставіць ветэрынарныя суправаджальныя дакументы, якія пацвярджаюць бяспеку і паходжанне тавара.

Таксама адсутнічала маркіроўка, якая дазваляе ідэнтыфікаваць тавар, якая змяшчае звесткі аб вытворцу, тэрміне рэалізацыі, даце вытворчасці, краіне паходжання і г.д.

Акрамя таго, “зафіксавана парушэнне ветэрынарна-санітарных правілаў транспарціроўкі рыбы, якая патрабуе захавання тэмпературнага рэжыму пры перавозцы і захоўванні: у транспартным сродку адсутнічала халадзільнае абсталяванне”.

Перамяшчэнне грузу па мытнай тэрыторыі Еўразійскага саюза забаронена, партыя рыбы вернута ў Беларусь, гаворыцца ў рэлізе.

20 лютага паведамлялася аб затрыманні на выездзе з Беларусі фуры, якая з парушэннем ліцэнзійных правілаў перавозіла партыю бульбы. Паводле інфармацыі Дзяржаўнага мытнага камітэта, груз аб’ёмам 35 тон коштам 47 тыс. рублёў перамяшчаўся ў Расію. У перавозчыка адсутнічаў спецыяльны дазвол на экспарт прадукцыі.