Створаны аргкамітэт па правядзенні пасяджэння УНС, яго парадак дня не раскрываюць

22 лютага, Позірк. Створаны арганізацыйны камітэт па падрыхтоўцы і правядзенні пасяджэнняў сёмага Усебеларускага народнага сходу. Гэта вынікае з пастановы прэзідыума УНС ад 11 лютага № 2, апублікаванай на Нацыянальным прававым інтэрнэт-партале.

Орган узначаліў прэм’ер-міністр Раман Галоўчанка.

У яго склад увайшло 35 чалавек: кіраўнікі парламента, міністэрстваў і ведамстваў, аблвыканкамаў, прэс-сакратар Аляксандра Лукашэнкі Наталля Эйсмант і першы сакратар ЦК праўладнага Беларускага рэспубліканскага саюза моладзі Аляксандр Лук’янаў.

Зацверджаны праект парадку другога пасяджэння сёмага УНС, аднак ён у дакумент не ўключаны (насупраць адпаведнага пункта стаіць пазнака “не рассылаецца“).

Пасяджэнне запланавана на красавік, заявіў Лукашэнка 11 лютага на пасяджэнні прэзідыума УНС.

У канцы снежня 2024 года старшыня пастаяннай камісіі Савета Рэспублікі па адукацыі, навуцы, культуры і сацыяльным развіцці Сяргей Сівец выказаў здагадку, што чарговае пасяджэнне УНС пройдзе ў красавіку — “з улікам каляндарнага цыклу“.

Усебеларускі народны сход склікаецца з ініцыятывы Лукашэнкі з 1996 года, як правіла, у перыяд палітычных кампаній.

VII пасяджэнне УНС, якое атрымала канстытуцыйны статус паводле афіцыйных вынікаў не прызнанага цывілізаванымі краінамі рэферэндуму 27 лютага 2022 года, было праведзена ў Мінску летась 24-25 красавіка. Старшынёй прэзідыума сходу практычна аднагалосна быў абраны Лукашэнка.

Згодна з абноўленай рэдакцыі Канстытуцыі, УНС з’яўляецца “найвышэйшым прадстаўнічым органам народаўладдзя”, які вызначае “стратэгічныя напрамкі развіцця грамадства і дзяржавы”, забяспечвае “непахіснасць канстытуцыйнага ладу, пераемнасць пакаленняў і грамадзянскую згоду”. Максімальная колькасць дэлегатаў УНС — 1.200, тэрмін іх паўнамоцтваў — пяць гадоў. Пасяджэнні УНС павінны праводзіцца не радзей аднаго разу ў год.

УНС зацвярджае асноўныя напрамкі ўнутранай і знешняй палітыкі, ваенную дактрыну, канцэпцыю нацыянальнай бяспекі, праграмы сацыяльна-эканамічнага развіцця; заслухоўвае штогадовыя пасланні прэзідэнта да парламента; у яго ёсць права заканадаўчай ініцыятывы, яно можа прапаноўваць змяненні і дапаўненні ў Канстытуцыю, разглядаць пытанне аб легітымнасці выбараў і інш.