Водазабеспячэнне ў Асіповічах адноўлена

19 лютага, Позірк. Парушанае ў выніку аварыі водазабеспячэнне ў Асіповічах (Магілёўская вобласць) адноўлена, паведаміў тэлеграм-канал раённай газеты “Асіповіцкі край”.

Адзначаецца, што “на працягу дня будзе праводзіцца хлараванне і забор проб вады для кантролю якасці”

Пра надзвычайнае здарэнне, якое адбылося ўначы, раней паведаміў кіраўнік горада Андрэй Дубінчык.

Паводле яго, прыкладна ў 2:30 “адбылася аварыя на водаправодзе, які падае ў раёне вуліцы Калініна, 39”. На месцы здарэння працавалі службы як мясцовага, так і Бабруйскага водаканала, а таксама супрацоўнікі МНС.

“Для лакалізацыі аварыі было адключана водазабеспячэнне з паўночнага і паўднёвага водазабораў горада”, — адзначыў Дубінчык.

Паводле інфармацыі, апублікаванай МНС, на час правядзення рамонтных работ была спынена падача вады 16 тыс. спажыўцам і 78 аб’ектам эканомікі горада. Цеплазабеспячэнне не было парушана. Быў арганізаваны падвоз вады жыхарам.

На месца выязджалі начальнік галоўнага ўпраўлення дзяржаўнай сістэмы папярэджання і ліквідацыі НС і грамадзянскай абароны Ігар Хадановіч і начальнік Магілёўскага абласнога ўпраўлення МНС Дзмітрый Голубеў.

Паводле звестак Нацыянальнага статыстычнага камітэта, у Асіповічах на 1 студзеня 2024 года пражывалі 29.103 жыхары. Гэта азначае, што без вады заставалася 55,2% насельніцтва горада.