Камандуючы лівійскай арміяй Хафтар прыбыў у Мінск для абмеркавання ваеннага супрацоўніцтва

18 лютага, Позірк. Камандуючы Лівійскай нацыянальнай арміяй (ЛНА) фельдмаршал Халіфа Хафтар прыбыў у Мінск з візітам для абмеркавання супрацоўніцтва з Беларуссю з ваеннай сферы.

Як паведамляе прэс-служба ЛНА на сваёй старонцы ў “Фэйсбуку”, бакі маюць намер “абмеркаваць шэраг пытанняў, якія ўяўляюць узаемную цікавасць”.

Лівійскія СМІ паведамілі 17 лютага, што Хафтара ў Мінску суправаджае сын Садам Хафтар і зяці Басем аль-Буайшы і Аюб аль-Фарджані.

Раней беларускія дзяржСМІ паведамілі, што Хафтара ў мінскім аэрапорце сустракаў старшыня КДБ Іван Церцель.

Пасля звяржэння і забойства ў 2011 годзе Муамара Кадафі (кіраваў у краіне 42 гады) у Лівіі дзейнічаюць два ўрады. У сталіцы Трыпалі дзейнічае прэм’ер-міністр Абдэль Хамід Дбейба, які прызнаецца ААН у якасці часовага кіраўніка дзяржавы. Іншы ўрад — ён месціцца ў Бэнгазі — узначальвае Усама Хаммад. Пры гэтым ЛНА, якую ўзначальвае 81-гадовы Хафтар, падпарадкоўваецца Палаце прадстаўнікоў — заканадаўчаму органу Лівіі, які базуецца ў Торбуку.

Падчас актыўнай фазы супрацьстаяння ў Лівіі ЛНА спрабавала захапіць Трыпалі. У СМІ тады паведамлялася, што ў складзе войска Хафтара ваююць найміты расійскац ПВК “Вагнер”.