Карпенка: Санкцыі не паўплываюць на маю прафесійную дзейнасць
9 лютага, Позірк. Аб уведзеных супраць яго персанальных санкцыях выказаўся ў эфіры тэлеканала “Беларусь 1” старшыня Цэнтрвыбаркама Ігар Карпенка.
Ён заявіў, што яго “заўсёды смешыць” замарожванне актываў за мяжой. Паводле слоў чыноўніка, “спадары ў Канадзе і Вялікабрытаніі” не павінны “турбавацца” з гэтай нагоды, бо актываў на тэрыторыі замежных дзяржаў ён не мае.
Да ўвядзення санкцый у дачыненні да сябе Карпенка ставіцца “вельмі спакойна”: “Няхай яны <…> не займаюцца гэтай непатрэбнай працай, якая ніякім чынам не паўплывае ні на маю прафесійную, ні на маю дзейнасць, як шэраговага грамадзяніна нашай суверэннай Рэспублікі Беларусь”.
Гаворачы аб прынятай Еўрапарламентам рэзалюцыі па выбарах у Беларусі, Карпенка заявіў, што “метадалогія ЕП, будзем так казаць, эмпірычная, гэта значыць ім адчуваецца і яны вырашылі выказаць сваю пазіцыю такім чынам”. Легітымнасць выбараў, падкрэсліў ён, “вызначаецца волевыяўленнем народа”.
