8 лютага, Позірк. Для ўвозу ў Беларусь гатовай скуры са шкур буйной рагатай жывёлы цяпер неабходна атрымліваць разавую ліцэнзію, вынікае з пастановы Савета міністраў № 73 ад 6 лютага.
Згодна з дакументам, апублікаваным на Нацыянальным прававым інтэрнэт-партале 8 лютага, ліцэнзію патэнцыйнаму імпарцёру выдае Міністэрства антыманапольнага рэгулявання і гандлю пасля ўзгаднення з канцэрнам “Беллегпрам”.
Патрабаванне не распаўсюджваецца на тавары, якія перамяшчаюцца транзітам; увозяцца ў якасці замежнай бязвыплатнай дапамогі; вырабленыя ў краінах Еўразійскага эканамічнага саюза (пры наяўнасці сертыфіката паходжання).
У выдачы ліцэнзіі можа быць адмоўлена, калі прасіцель падаў дакументы, што не адпавядаюць патрабаванням; калі выявіцца, што “патэнцыйны пастаўшчык тавараў не з’яўляецца іх вытворцам”.
Пастанова дзейнічае на працягу шасці месяцаў пасля афіцыйнага апублікавання.
