27 студзеня, Позірк. Ідэнтыфікаваныя 365 удзельнікаў пратэстных акцый, якія прайшлі за мяжой 26 студзеня, інфармацыя пра іх “далучаная да матэрыялаў крымінальнай справы”, паведамляе Следчы камітэт.
Сцвярджаецца, што ў акцыях 26 студзеня ў розных краінах прыняў удзел 581 чалавек. Сярод ідэнтыфікаваных 203 удзельнікі акцый у Варшаве, 11 — ва Уроцлаве, 18 — у Беластоку, 29 — у Вільнюсе, 39 — у Нью-Ёрку, 11 — у Празе.
СК заяўляе, што “цяпер рамках расследавання крымінальнай справы іх дзейнасць задакументаваная, прынятае рашэнне аб прыцягненні фігурантаў да крымінальнай адказнасці, у тым ліку ў парадку спецыяльнай вытворчасці”.
“Правяраецца наяўнасць у іх маёмасці і нерухомасці на тэрыторыі Беларусі, у тым ліку зарэгістраванай на іншых асоб”, — гаворыцца ў паведамленні.
Акцыі беларускай дыяспары 26 студзеня былі праведзеныя на знак пратэсту супраць мерапрыемства, якое ўлады ў Мінску называюць “прэзідэнцкімі выбарамі”. Кампанія праходзіла пад поўным кантролем чыноўнікаў і сілавікоў. ЦВК абвясціў пераможцам Аляксандра Лукашэнку, які нібыта набраў 86,82% галасоў.
13 студзеня СК паведаміў, што ў вытворчасці галоўнага следчага ўпраўлення “знаходзяцца крымінальныя справы ў дачыненні да кіраўнікоў і ўдзельнікаў розных экстрэмісцкіх фарміраванняў за межамі Рэспублікі Беларусь, якія бяруць удзел у акцыях, арганізаваных антыбеларускімі цэнтрамі”.
Сцвярджалася, што следства атрымала інфармацыю “аб планах збеглых, накіраваных на спробу дыскрэдытацыі Рэспублікі Беларусь на міжнароднай арэне і распальвання сацыяльнай варожасці, з дапамогай малалікіх вулічных акцый, якія імітуюць падтрымку радыкальных рухаў”. Сярод акцый СК згадвае перформанс “Лукашэнка ў шродэр”“, арганізаваны “Народнымі амбасадамі”.
16 траўня 2024 года Следчы камітэт паведаміў, што завёў у дачыненні да 104 удзельнікаў святкавання Дня Волі за мяжой крымінальную справу паводле арт. 3611 (стварэнне экстрэмісцкага фарміравання або ўдзел у ім) і арт. 3691 (дыскрэдытацыя Рэспублікі Беларусь) КК.
Было заяўлена, што ў рамках расследавання атрымана інфармацыя аб “аб’ектах нерухомасці і маёмасці, якія належаць падазраваным” у Беларусі. Паведамлялася аб следчых дзеяннях — “аглядах, ператрусах, накладанні арышту на маёмасць” і інш.
