Кіраўніца Еўрапарламента: Заўтрашнія выбары ў Беларусі — фікцыя

25 студзеня, Позірк. Фікцыяй назвала прызначаныя на 26 студзеня прэзідэнцкія выбары ў Беларусі прэзідэнт Еўрапейскага парламента (ЕП) Раберта Метсола.

“Маё пасланне народу Беларусі: трымайцеся, мы вас падтрымліваем, час дыктатуры скончыцца. Дэмакратыя пераможа”, — напісала яна на сваёй старонцы ў сацыяльнай сетцы Х.

Беларускі дэмакратычны лідар Святлана Ціханоўская падзякавала еўрапейскаму палітыку за ацэнку падзей, што адбываюцца ў краіне.

“Дзякуй, што падтрымалі народ Беларусі. Ваша салідарнасць нагадвае нам, што дэмакратыя пераможа, і беларусы зоймуць годнае месца ў сям’і свабодных народаў Еўропы”, — адрэагавала палітык на паведамленне кіраўніцы Еўрапарламента.

22 студзеня ЕП прыняў рэзалюцыю, у якой гаворыцца пра непрызнанне электаральнай працэдуры ў Беларусі і легітымнасці Аляксандра Лукашэнкі. Дакумент падтрымалі 567 з 658 еўрапарламентарыяў, што ўзялі ўдзел у галасаванні, 25 выступілі супраць, 66 устрымаліся.

Сёмыя прэзідэнцкія выбары ў Беларусі прызначаныя на 26 студзеня 2025 года (датэрміновае галасаванне пачалося 21 студзеня і працягнецца пяць дзён).

Акрамя Лукашэнкі кандыдатамі на пасаду прэзідэнта зарэгістраваныя лідары трох праўладных партый — Алег Гайдукевіч (Ліберальна-дэмакратычная партыя Беларусі), Сяргей Сыранкоў (Камуністычная партыя Беларусі) і Аляксандр Хіжняк (Рэспубліканская партыя працы і справядлівасці). Яшчэ адзін кандыдат — былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года Ганна Канапацкая, якая пазіцыянуе сябе як “дэмакратычную альтэрнатыву”, аднак крытыкуе не Лукашэнку, а яго апанентаў, што знаходзяцца ў турме або за мяжой.

Прэзідэнцкая кампанія праходзіць пад поўным кантролем улад. Палітычнае поле краіны цалкам зачышчанае ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць пра імітацыю канкурэнцыі. З крытыкай выбараў апрача Еўрапарламента выступілі ЗША, шэраг іншых дэмакратычных дзяржаў ды інш.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.