У Беларусі назіраецца рост даверу да ўлады і падтрымкі ўварвання РФ ва Украіну — сацдаследаванне
24 студзеня, Позірк. У Беларусі назіраецца тэндэнцыя росту даверу да ўлады і падтрымкі яе ўдзелу ва ўварванні Расіі ва Украіну, заявіў незалежны сацыёлаг Філіп Біканаў на прэзентацыі аналітычнага даклада “8-ы Беларускі трэкер перамен”.
Вымярэнне грамадскай думкі праводзілася з 3 па 10 студзеня шляхам апытання больш за 600 чалавек, якія жывуць у розных населеных пунктах, сказаў Біканаў.
Паводле яго слоў, у студзені 2025 года доля агрэгаванага сегмента тых, хто давярае ўладзе, у параўнанні з папярэднім вымярэннем (ліпень 2024-га) павялічылася на 10 працэнтных пунктаў. Змены адбываюцца паступова за кошт нейтральных сегментаў, адзначыў сацыёлаг. Сярод іх доля схільных не давяраць уладзе змяншаецца, а схільных давяраць — павялічваецца. Гэта звязана з успрыманнем Лукашэнкі як пастаўшчыка міру і эканамічнай стабільнасці, заявіў Біканаў.
Многія беларусы жывуць у адчуванні адноснай нармальнасці, хоць ведаюць пра рызыкі выказвання палітычнай пазіцыі, сказаў ён, адзначыўшы, што “многія недаацэньваюць маштабы рэпрэсій“.
Упершыню сацыёлагі зафіксавалі рост прыхільнікаў удзелу беларускай арміі ў расійскай ваеннай агрэсіі супраць Украіны. Трэнд адзначаны ў сегменце “схільных давяраць“, дзе ўзровень падтрымкі практычна дасягнуў значэнняў “зацятых прыхільнікаў“.
За тое, што Беларусь павінна ваяваць на баку Расіі, выступаюць 15,1% зацятых прыхільнікаў улады, 13,9% схільных давяраць уладзе, 6,6% схільных не давяраць і 1,4% зацятых праціўнікаў.
Падтрымліваюць ідэю, што Беларусь павінна ўдзельнічаць у вайне на баку Украіны, 1,5% зацятых прыхільнікаў рэжыму, 0,7% схільных давяраць яму, 1,2% схільных не давяраць і 13,5% зацятых праціўнікаў улады.
Беларусь “не павінна ўдзельнічаць у вайне ні на адным баку канфлікту“ — так лічаць адпаведна 83,5%, 85,5%, 92,2% і 85,1%.
