5 студзеня, Позірк. У 2024 годзе ва ўездзе ў Латвію “па меркаваннях бяспекі” было адмоўлена 1.302 замежным грамадзянам, паведамляе інфармацыйнае агенцтва LETA.
1.269 з іх маюць грамадзянства дзяржаў, якія не ўваходзяць у Еўрасаюз і Еўрапейскую эканамічную зону, адзначае партал навін Delfi.
Адмову ва ўездзе ў Латвію атрымалі: 401 грамадзянін Расіі, 377 — Малдовы, 306 — Украіны, 137 — Беларусі, 20 — Казахстана, 10 — Узбекістана, пяцёра — Ізраіля, па трое — Грузіі і Таджыкістана, па двое — Вялікабрытаніі, Каргызстана і ЗША, адзін — Сербіі.
Адзначаецца, што з лютага 2022 года Служба дзяржаўнай бяспекі (СДБ) Латвіі ў супрацоўніцтве з Дзяржаўнай памежнай аховай “ажыццяўляе на ўсходняй мяжы ўзмоцнены кантроль замежных грамадзян, якія ўязджаюць у краіну”.
“Калі падчас праверак атрыманая інфармацыя аб тым, што замежны грамадзянін можа прадстаўляць рызыкі для нацыянальнай бяспекі, СДБ рэкамендуе памежнай ахове адмовіць яму ва ўездзе ў Латвію”, — падкрэсліваецца ў публікацыі.
