МЗС Эстоніі: Мы дапаможам пабачыць, што ў Беларусі будуць не выбары, а фарс
Сталіца Эстоніі Талін
20 снежня, Позірк. Эстонія не прызнае прэзідэнцкія “выбары” ў Беларусі, запланаваныя на 26 студзеня 2025 года, і іх вынікі. Гэта вынікае з каментара для ERR News генеральнага сакратара міністэрства замежных спраў гэтай краіны Ёнатана Всевіёва.
“Мы не лічым, што ў студзені ў Беларусі пройдуць выбары. Калі рэжым абвесціць, што выбары адбыліся, то мы, відавочна, дапаможам іншым убачыць, што гэта фарс”, — прыводзіць словы дыпламата ERR News. “На жаль, беларускі народ жыве пад дыктатурай,” — дадаў генсак МЗС.
Каментар Всевіёва сугучны з выказваннямі міністра замежных спраў Эстоніі Маргуса Цахкны, якія прагучалі 19 лістапада. “Прэзідэнцкія выбары, якія павінны адбыцца ў студзені 2025 года, арганізаваныя ў атмасферы тэрору і не могуць адпавядаць дэмакратычным нормам”, — заявіў міністр.
Цахкна таксама адзначыў, што заходнія краіны “павінны ўзмацніць санкцыі супраць рэжыму Лукашэнкі”. Гэта неабходна, дадаў дыпламат, каб “ён зразумеў, што продаж Расіі сваёй краіны і народа недапушчальныя”.
Прэзідэнцкая кампанія (асноўны дзень галасавання прызначаны на 26 студзеня 2025 года) праходзіць пад поўным кантролем уладаў. Палітычнае поле краіны цалкам зачышчана ад актыўных апанентаў Аляксандра Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, а праваабаронцы кажуць пра імітацыю канкурэнцыі.
З 1996 года ніводная выбарчая кампанія ў Беларусі не была прызнана незалежнымі назіральнікамі празрыстай і адпаведнай дэмакратычным стандартам.
