Парламенцкую групу “За свабодную Беларусь” узначаліў старшыня камісіі па міжнародных справах Сената Польшчы Гжэгаж Схетына

27 лістапада, Позірк. Старшынёй парламенцкай групы Сейма і Сената Польшчы “За свабодную Беларусь” абраны Гжэгаж Схетына, паведамляецца ў тэлеграм-канале кіраўніка Народнага антыкрызіснага ўпраўлення Паўла Латушкі.

61-гадовы Схетына — былы маршал Сейма (2010–2011 гады) і міністр замежных спраў (2014–2015) Польшчы, а цяпер старшыня камісіі па міжнародных справах верхняй палаты парламента.

Падчас паседжання групы Латушка, запрошаны на яго, абазначыў важнасць непрызнання прэзідэнцкіх выбараў 2025 года, падтрымку ў прыцягненні Аляксандра Лукашэнкі да адказнасці за “злачынствы супраць беларускага народа”, садзейнічанне ў легалізацыі беларускіх грамадзян на тэрыторыі Польшчы, у тым ліку ваюючых ва Украіне беларускіх добраахвотнікаў, доступ вышэйшай адукацыі для абітурыентаў з Беларусі, “падтрымку беларускай ідэнтычнасці і незалежных СМІ”.

Паводле паведамлення Латушкі, Схетына мае намер “захоўваць актыўную палітыку ў дачыненні да Беларусі, ажыццяўляць далейшую ізаляцыю рэжыму і адначасова праяўляць адкрытасць да беларускага грамадства”.

Паведамляецца таксама, што працоўная група плануе правядзенне публічных слуханняў у парламенце Польшчы па сітуацыі ў Беларусі.

Першае паседжанне групы прайшло ў сакавіку. Першапачаткова яе кіраўніком быў абраны дэпутат Сейма, старшыня Парламенцкай асамблеі НАТО Міхал Шчэрба, абраны пасля ў Еўрапарламент.