29 кастрычніка, Позірк. Басманны раённы суд Масквы яшчэ на тры месяцы падоўжыў тэрмін утрымання пад вартай 53-гадовага грамадзяніна Беларусі Сяргея Ерамеева, паведамляе ТАСС.
Аб затрыманні Ерамеева ў Омскай вобласці па падазрэнні ў здзяйсненні тэракту паведаміла 7 снежня 2023 года Федэральная служба бяспекі РФ.
Ведамства сцвярджала, што мужчына “даў прызнальныя паказанні аб выняцці па заданні грамадзяніна Беларусі 1981 г.н., які пражывае ў Літве і дзейнічае пад кантролем украінскіх спецслужбаў, з тайніка васьмі выбуховых прылад, дастаўцы іх на асабістым аўтамабілі ў Бурацію і закладцы на цыстэрнах грузавых цягнікоў”.
Сцвярджалася, што “затрыманы падарваў саставы з нафтапрадуктамі, якія рухаліся па маршрутах Тайшэт — Тында і Тайшэт — Нерюнгры, 29 і 30 лістапада ў Бураціі”. “Калі яны праходзілі па Паўночнамуйскім тунэлі і абводным шляху Байкала-Амурскай магістралі, спрацавалі закладзеныя выбуховыя прылады, што стала прычынай узгарання цыстэрнаў з гаруча-змазачнымі матэрыяламі”, — гаварылася ў заяве спецслужбы.
Ерамееў паведаміў, што хацеў паралізаваць рух на чыгунцы: “Я напісаў у тлумачэнні, што праз БАМ цяпер вязуць боепрыпасы… Галоўная мэта была перашкодзіць руху”.
Мужчына абвінавачваецца паводле ч. 2 арт. 205 КК РФ (тэрарыстычны акт).
Ерамееў — экс-супрацоўнік наваполацкага нафтаперапрацоўчага завода “Нафтан” (Віцебская вобласць), удзельнік стачкі на прадпрыемстве ў 2020 годзе. На прадпрыемстве працаваў прыбарыстам кантрольна-вымяральных прыбораў і аўтаматыкі.
