Карпенка: Збор подпісаў за вылучэнне ў кандыдаты на прэзідэнта распачнецца 7 лістапада
24 кастрычніка, Позірк. Збор подпісаў “за вылучэнне ў кандыдаты на прэзідэнта” распачнецца 7 лістапада, паведаміў журналістам па выніках пасяджэння Цэнтральнай выбарчай камісіі 24 кастрычніка яе старшыня Ігар Карпенка.
На пасяджэнні ён паведаміў, што дакументы аб рэгістрацыі ініцыятыўных груп для вылучэння кандыдатаў у прэзідэнты неабходна падаць у Цэнтрвыбаркам не пазней за 1 лістапада. Датэрміновае галасаванне на выбарах прэзідэнта пачнецца 21 студзеня 2025 года.
ЦВК зацвердзіў каляндарны план мерапрыемстваў па падрыхтоўцы і правядзенні выбараў прэзідэнта, палажэнне пра назіральнікаў, пра пазабюджэтны фонд, а таксама каштарыс выдаткаў на выбары.
Сёмыя выбары прэзідэнта Беларусі прызначаныя на 26 студзеня 2025 года. У дзень, калі Палата прадстаўнікоў прыняла адпаведнае рашэнне, 23 кастрычніка, Аляксандр Лукашэнка паведаміў, што возьме ў іх удзел.
Дэмсілы ў сумеснай заяве, прымеркаванай да прызначэння даты прэзідэнцкіх выбараў, заклікалі галасаваць на іх “супраць усіх”. Адзначаецца, што галасаванне “супраць усіх” пакажа, што “беларускае грамадства па-ранейшаму супраць Лукашэнкі і патрабуе свабодных і сумленных выбараў”.
З 1996 года ніводная выбарчая кампанія ў Беларусі не была прызнана незалежнымі назіральнікамі транспарэнтнай і адпаведнай дэмакратычным стандартам.
