Лукашэнка адмаўляе перадвыбарны характар сваіх суботніх паездак па раёнах

19 кастрычніка, Позірк. Аляксандр Лукашэнка адмаўляе, што яго паездкі па раёнах Беларусі з’яўляюцца часткай перадвыбарнай кампаніі. Наконт характару сваіх суботніх візітаў ён выказаўся 19 кастрычніка на фестывалі-кірмашы “Дажынкі-2024” у Валожыне (Мінская вобласць).

“Хачу ўсё ж адказаць на адно хвалюючае пытанне. Можа быць, [ён хвалюе] нават некага з нашых людзей, але найбольш пра гэта кажуць нашыя збеглыя: “Лукашэнка паехаў на “Дажынкі”, пачаў перадвыбарную кампанію”, — сказаў ён (на падставе відэафрагмента ў неафіцыйным тэлеграм-канале прэс-службы спікера). — Запомніце: больш за ўсё, чаго б я не хацеў, каб гэтая кампанія пачыналася. Так, мы, як звычайна, па-беларуску, чыста, акуратна, на вачах усёй сусветнай супольнасці абярэм свайго прэзідэнта. Вы абярэце таго, хто гэтага заслугоўвае — з вашага пункту гледжання. Таму ніякай перадвыбарнай кампаніі”.

“Але калі яны лічаць, што перадвыбарная кампанія, — [я] маю на гэта права. Я пра гэта не кажу як пра перадвыбарную кампанію, але як прэзідэнт краіны — не чужы вам чалавек — я вырашыў праехаць сёлета па ўсіх мерапрыемствах, звязаных не толькі з “Дажынкамі”, — дадаў Лукашэнка.

Ён выказаў меркаванне, што яму “як прэзідэнту”, магчыма, больш “не давядзецца”, “не будзе магчымасці” прыехаць да “вяскоўцаў”, з якімі “заўсёды быў на адной хвалі”.

“Да вас, людзей, якія ніколі не здраджвалі мне, якія зрабілі неймавернае для краіны, — заявіў спікер. — Узгадайце, на золку нашай маладосці нам паесці не было чаго. Адзінае, чаго хапала, — талонаў, а на гэтыя талоны не ўсё купіш. Сёння мы стварылі… вы выканалі маё галоўнае патрабаванне — гарантавалі харчовую бяспеку нашай краіны”.

“Хіба мы тады, некалькі дзесяцігоддзяў таму маглі падумаць, што мы можам пастаўляць харчаванне ў 100 краін свету. Слухайце, карміць увесь свет. У свеце крыху больш за 120 дзяржаў (у ААН уваходзіць 193 дзяржавы. — “Позірк”.). Мы больш чым у 100 краін пастаўляем харчаванне і мінеральныя ўгнаенні. Мы гэта зрабілі. Вы гэта зрабілі. Дык мушу я падзякаваць вам за гэта? Абавязаны. Вось тая мэта, якую я пераследую, наведваючы кожны рэгіён. Для таго, каб убачыць вас і ад усёй душы падзякаваць вам за той подзвіг, які вы здзейснілі”, — сказаў ён.

Лукашэнка, які адмаўляе правядзенне перадвыбарнай кампаніі, паабяцаў, што “ў будучым” улады будуць “рабіць усё для таго, каб сялянам было лепш”. Ён заявіў, што ведае “і пра дарогі, і пра жыллё, і іншае”, падкрэсліўшы, што “цэлыя праграмы сёння ўжо апрабаваныя на практыцы для таго, каб вырашыць гэтыя пытанні для сялян”. Для пенсіянераў ён паабяцаў выпрацаваць “такія сістэмы, каб не быў ніхто абдзеленым, каб старыя не пачуваліся чужымі ў той дзяржаве, якую яны стварылі ўласнымі рукамі”.

“Вось і ўся канспіралогія: я прыехаў да вас, у іншыя рэгіёны, каб нізка пакланяцца вам за тую працу, за той подзвіг, за патрыятызм і адданасць, якія вы выдалі на-гара за гэтыя дзесяцігоддзі”, — заявіў спікер.

Лукашэнка дагэтуль неадназначна выказваўся наконт свайго ўдзелу ў прэзідэнцкіх выбарах 2025 года. Аднак з пачатку гэтага месяца ён кожную суботу наведвае раёны і выступае на фестывалях “Дажынкі” з прамовамі, якія можна ахарактарызаваць як перадвыбарныя. 5 кастрычніка ён выступіў у Мікашэвічах (Брэсцкая вобласць), 12 кастрычніка — у Карме (Гомельская вобласць).

Сёмыя прэзідэнцкія выбары ў Беларусі павінны адбыцца не пазней за 20 ліпеня 2025 года. Дэмсілы краіны неаднаразова заяўлялі, што будуць дамагацца іх непрызнання міжнароднай супольнасцю.

Папярэднія выбары, якія адбыліся ў 2020 годзе, адзначыліся самымі масавымі пратэстамі за ўсю гісторыю незалежнай Беларусі. Палітычны крызіс, які ўзнік пасля іх, і шырокамаштабныя рэпрэсіі працягваюцца дагэтуль.