На тры месяцы абмежаваны вываз з Беларусі белакачаннай капусты, яблыкаў і рэпчатай цыбулі
10 кастрычніка, Позірк. У Беларусі на тры месяцы ўведзена ліцэнзаванне вывазу за межы краіны белакачаннай капусты, яблыкаў і цыбулі рэпчатай, паведамляецца ў тэлеграм-канале ўрада.
Адпаведную пастанову падпісаў прэм’ер-міністр Раман Галоўчанка.
Паведамляецца, што вываз гэтай прадукцыі незалежна ад краіны паходжання будзе ажыццяўляцца па разавых ліцэнзіях, якія выдаюцца Міністэрствам антыманапольнага рэгулявання і гандлю па ўзгадненню з аблвыканкамамі (Мінскім гарвыканкамам).
Рашэнне аб магчымасці выдачы такой ліцэнзіі “будзе прымацца ўпаўнаважанымі органамі зыходзячы з ацэнкі суадносін свабодных рэсурсаў гэтай прадукцыі ў Рэспубліцы Беларусь і патрэбнасці краіны ў ёй на момант узгаднення ліцэнзіі”.
Сцвярджаецца, што дакумент падпісаны “ў мэтах забеспячэння ўнутранага рынку сельскагаспадарчай прадукцыяй у міжсезонны перыяд у поўным аб’ёме”.
8 кастрычніка ўрад прадоўжыў на чарговыя паўгода ліцэнзаванне вывазу з Беларусі збожжавых, з 23 верасня на аналагічны тэрмін прадоўжана забарона на вываз з краіны больш як 250 відаў прамтавараў.
