23 верасня, Позірк. Польшчы неабходна выконваць міжнародныя абавязальніцтвы ў галіне правоў чалавека на мяжы з Беларуссю, такая выснова ўтрымліваецца ў заяве камісара Савета Еўропы (СЕ) па правах чалавека Майкла О’Флаэрці па выніках наведвання польскай дзяржавы 16–18 верасня.
Місія прадстаўніка СЕ была выкліканая “даўнімі паведамленнямі пра інцыдэнты на польска-беларускай мяжы”.
Прызнаючы ролю Польшчы ў дапамозе мільёнам людзей, якія ратуюцца ад расійскай агрэсіі ва Украіне, а таксама існыя праблемы, звязаныя з “выкарыстаннем міграцыі ў сваіх мэтах і дэстабілізуючымі дзеяннямі з боку беларускіх уладаў на мяжы”, О’Флаэрці лічыць, што практыка прымусовага вяртання мігрантаў у Беларусь не дазваляе “ў поўнай меры выконваць міжнародныя стандарты ў галіне правоў чалавека”.
Міграцыйны крызіс на мяжы Беларусі і Еўрасаюза цягнецца з вясны 2021 года. Варшава, Рыга і Вільнюс лічаць яго “гібрыднай атакай”, арганізаванай рэжымамі ў Мінску і Маскве.
Згодна з праведзеным “Позіркам” маніторынгам, з пачатку года суседнія краіны ЕС папярэдзілі больш за 31 тыс. спробаў незаконнага пранікнення мігрантаў з беларускай тэрыторыі, у тым ліку Польшча — больш за 26 тыс.
