20 верасня, Позірк. Больш за 5 тыс. інтэрнэт-рэсурсаў у Беларусі прызнаныя “экстрэмісцкімі”, “доступ да іх абмежаваны”, заявіў міністр інфармацыі Марат Маркаў 20 верасня ў Мінску на канферэнцыі “Міжнародныя стандарты і выбарчы працэс: досвед і перспектывы развіцця”.
Усяго “на дадзены момант прынята рашэнне аб абмежаванні доступу да амаль 14 тыс. інтэрнэт-рэсурсаў”, цытуе чыноўніка агенцтва Sputnik.
Паводле слоў кіраўніка Мінінфарма, са студзеня 2015-га па студзень 2020-га было заблакавана каля 400 інтэрнэт-рэсурсаў, пасля гэтага колькасць блакаванняў павялічылася ў 10 разоў больш.
“І гэтыя лічбы кажуць не пра тое, якое злое ў нас Міністэрства інфармацыі, а пра тое, якія каласальныя сродкі трацяцца апанентамі на інфармацыйнае расхістванне Беларусі”, — сказаў Маркаў.
У 2023 годзе Мінінфарм заблакаваў доступ да 3.388 рэсурсаў і іх “люстэркаў”, якія тычацца продажу наркотыкаў, парнаграфіі, “рэкрутуюць і распавядаюць” аб розных “экстрэмісцкіх фарміраваннях”, паведаміў 14 жніўня намеснік кіраўніка адміністрацыі Аляксандра Лукашэнкі, былы кіраўнік ведамства Уладзімір Пярцоў.
“Гэта і прапагандысцкія дэструктыўныя экстрэмісцкія рэсурсы, і шматлікія праявы ў інтэрнэце медыяпадобных, так званых мімікрыруючых пад журналістыку аўтараў, якія выконваюць сваю функцыю ўздзеяння на колы нашай аўдыторыі, якія не вызначыліся, ёсць лаяльнымі або думаюць троху інакш”, — сказаў чыноўнік.
Пасля падаўлення маштабных пратэстаў супраць сфальсіфікаваных прэзідэнцкіх выбараў 2020 года і жорсткасці сілавікоў рэжым Аляксандра Лукашэнкі стаў метадычна знішчаць непадкантрольную яму частку медыясектара. Асноўныя незалежныя СМІ былі разгромленыя, многія іх супрацоўнікі трапілі пад крымінальны пераслед або былі вымушаныя пакінуць краіну, ратуючыся ад рэпрэсій, і аднавіць працу за мяжой.
Паводле даных Беларускай асацыяцыі журналістаў, у няволі знаходзіцца 33 прадстаўнікі медыя.
