Памілавана яшчэ 37 асуджаных за пратэсты (абноўлена)

16 верасня, Позірк. Аляксандр Лукашэнка падпісаў указ аб памілаванні яшчэ 37 чалавек, асуджаных за “злачынствы экстрэмісцкай накіраванасці”, паведамляе яго прэс-служба.

Адзначаецца, што памілаванне, якое прэс-служба называе “чарговым жэстам гуманізму з боку дзяржавы ў дачыненні да тых, хто спатыкнуўся”, адбылося напярэдадні Дня народнага адзінства, які адзначаецца 17 верасня.

Сярод памілаваных шэсць жанчын.

“Шэраг памілаваных маюць хранічныя захворванні, з’яўляюцца інвалідамі, пенсіянерамі. Усе яны раскаяліся і прасілі даць ім магчымасць вярнуцца на волю, весці законапаслухмяны лад жыцця”, — сцвярджае блізкі да Лукашэнкі тэлеграм-канал “Пул Першага”.

Хадайніцтвы асуджаных нібыта “дадаткова вывучаліся” камісіяй па вяртанні палітэмігрантаў, якую ўзначальвае генеральны пракурор Андрэй Швед.

На пачатку ліпеня праваабаронцы паведамлялі аб выхадзе 18 палітвязняў, якое адбылося пасля заявы Лукашэнкі аб вызваленні яго “вельмі цяжкахворых” апанентаў.

Старшыня Вярхоўнага суда Валянцін Сукала паведаміў, што пасля згаданай заявы было вызвалена 14 чалавек. Сярод іх анкахворы Рыгор Кастусёў, а таксама Дар’я Лосік, Тамара Астрэйка, Святлана Лупач, Кацярына Мадзянкова і Паліна Палавінка.

16 жніўня Лукашэнка падпісаў указ аб памілаванні 30 асоб, асуджаных за злачынствы “пратэстнай накіраванасці”. У ліку памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.

Праваабаронцам было вядома пра 25 палітвязняў, якія выйшлі на волю па памілаванні ў рамках жнівеньскага ўказа. Названыя імёны 15 з іх: Ксенія Луцкіна, Ірына Санкоўская, Васіль Бераснеў, Наталля Пятровіч, Вольга Новікава, Ала Зуева, Вольга Страбоўская, Кацярына Леў, Тамара Каравай, Святлана Палуэктава, Яўген Чуміла, Павел Кучынскі, Руслан Красаў, Аляксандр Галуза, Алег Зыкун.

4 верасня 7 жанчын і 23 мужчыны, “асуджаныя за злачынствы пратэстнай накіраванасці”, былі памілаваныя ў адпаведнасці з указам № 343, паведаміла напярэдадні прэс-служба Лукашэнкі. Большасць з іх — бацькі непаўналетніх і малалетніх дзяцей.

Памілаваныя былі пазбаўленыя волі за каментары ў інтэрнэце, вынікала са слоў Шведа.

Такім чынам, гэта чацвёртае групавое памілаванне палітвязняў з пачатку ліпеня.

Абнаўленне:

Паводле звестак праваабарончага цэнтра “Вясна”, з 3 ліпеня на волю па памілаванні выйшла 115 чалавек. Праваабаронцам вядомыя 57 прозвішчаў палітвязняў, якія, як і раней, не разгалошваюцца.

У Беларусі цяпер 1.359 чалавек прызнана палітычнымі зняволенымі.