У 2025 годзе падатак на даходы па дывідэндах арганізацый з “недружалюбных краін” плануецца павысіць

30 жніўня, Позірк. Стаўку падатку на даходы па дывідэндах, атрымальнікамі якіх з’яўляюцца арганізацыі з “недружалюбных краін”, плануецца падняць з 15 да 25% у 2025 годзе. Аб гэтым на пасяджэнні пастаяннай камісіі па эканоміцы, бюджэце і фінансах Савета Рэспублікі, прэзентуючы прапанаваныя навацыі Падатковага кодэкса, заявіў 29 жніўня першы намеснік міністра фінансаў Дзмітрый Кійко.

Гэта навацыя, паводле слоў намесніка міністра, якія прыводзяць дзяржСМІ, накіравана на “стымуляванне захавання прыбытку ў Беларусі”.

Таксама прапануецца адмена льготы па падаходным падатку па даходах, атрыманых фізічнымі асобамі ад продажу долей у статутным фондзе беларускіх арганізацый і іх акцый.

Намеснік міністра фінансаў Алена Печань апісала запланаванае павышэнне зарплат бюджэтнікам у будучым годзе праз рост базавай стаўкі (у сярэднегадавым вылічэнні на 8%) і павелічэнні на 60% аб’ёму сродкаў, што выдзяляюцца на выплаты надбавак асобным катэгорыям работнікаў. Найбольшы прырост па надбаўках, адзначыла яна, будзе накіраваны на павелічэнне заробкаў настаўнікаў.

Як паведамлялася, міністр фінансаў Юры Селіверстаў перад пасяджэннем урада 21 жніўня заявіў, што дэфіцыт беларускага бюджэту ў 2025 годзе чакаецца на ўзроўні 4,5 млрд рублёў, ці 1,6% ВУП. Згодна з яго ацэнкай, даходы бюджэту складуць 45,5 млрд рублёў, выдаткі — каля 50 млрд.

Пры гэтым ён анансаваў з 1 студзеня павелічэнне базавай стаўкі для ўсіх катэгорый бюджэтнікаў, а з верасня наступнага года — павышэнне надбаўкі асобным катэгорыям работнікаў.

Згодна з пастановай Савета міністраў ад 19 красавіка 2014 года № 299, у Беларусі для асоб з “недружалюбных дзяржаў”, якія ў той ці іншай меры валодаюць беларускімі кампаніямі, да канца 2025 года ўведзена абмежаванне на выплату прыбытку і дывідэндаў.

Дакумент устанаўлівае максімальную суму, якая можа быць выплачана за год у агульнай складанасці ўсім замежным уласнікам адной зарэгістраванай у Беларусі юрыдычнай асобы – 80 тыс. базавых велічынь (цяпер — 3,2 млн рублёў, або 981 тыс. долараў).

У пастанове нагадваецца, што ў пералік замежных дзяржаў, якія здзяйсняюць “недружалюбныя дзеянні” ў дачыненні да Беларусі, яе грамадзян і арганізацый, уваходзяць Албанія, Аўстралія, Вялікабрытанія, ЗША, Ісландыя, Канада, Ліхтэнштэйн, Нарвегія, Новая Зеландыя, Паўночная Македонія, Чарнагорыя, Швейцарыя, а таксама ўсе краіны Еўрасаюза.

У верасні 2023 года Аляксандр Лукашэнка сваім указам № 285 устанавіў асаблівы парадак атрымання асобамі з “недружалюбных дзяржаў” прыбытку і дывідэндаў. Для выплат такім удзельнікам юрыдычныя асобы павінны былі адкрыць у банках Беларусі спецыяльныя рахункі (рахункі рэзідэнтаў).

Пералічаныя на іх сродкі было дазволена выкарыстоўваць толькі для фінансавання інвестпраектаў у Беларусі, пагашэння запазычанасці па асобных крэдытах банкаў, размяшчэння безадзыўных укладаў на тэрмін не менш за год, іншыя мэты, “ўзгодненыя ўрадам з кіраўніком дзяржавы”.

У ліпені 2022 года ўрад зацвердзіў спіс беларускіх юрыдычных асоб з уласнікамі з “недружалюбных дзяржаў”, якім забаронена адчужаць свае долі (акцыі) у статутных фондах. Першапачаткова ў ім фігуравала 190 суб’ектаў гаспадарання з капіталам з Аўстрыі, Балгарыі, Брытанскіх Віргінскіх Астравоў, Вялікабрытаніі, Германіі, Даніі, Іспаніі, Італіі, Кіпра, Латвіі, Літвы, Люксембурга, Нідэрландаў, Нарвегіі, Польшчы, ЗША, Фінляндыі, Швейцарыі, Швецыі, Эстоніі. Пазней спіс прадпрыемстваў неаднаразова мяняўся.

Па рашэнні Саўміна, з красавіка 2024 года і да канца 2026-га для арганізацый з “недружалюбных дзяржаў”, якія вядуць дзейнасць у Беларусі не праз пастаяннае прадстаўніцтва, устаноўлены падатак на даход у памеры 25%. Да гэтага адпаведная стаўка складала 15% (за выключэннем асобных выпадкаў).

У сакавіку гэтага года Лукашэнка санкцыянаваў спрошчанае адчужэнне маёмасці асоб з “недружалюбных дзяржаў”.