28 жніўня, Позірк. Падчас праверкі рэйсавага аўтобуса, які рухаўся па маршруце Мінск — Вільнюс, выяўленыя і канфіскаваныя буйная сума наяўных і партыя кантрабандных цыгарэт, паведаміла 27 жніўня Мытная служба Літвы.
Гэта адбылося 13 жніўня ў пункце пропуску Мядзінінкай (з беларускага боку — Каменны Лог).
Адзначаецца, што супрацоўнікі мытні выявілі 8 блокаў (80 пачкаў) цыгарэт, схаваных у багажы кіроўцы аўтобуса — грамадзяніна Беларусі. Пакет з наяўнасцю, як паведамляецца, быў знойдзены ў “баку з вадой для мыцця рук”.
Канфіскавана 500 тыс. расійскіх рублёў, 242.016 туркменскіх новых манатаў, 9.625 гамбійскіх даласаў, 200 еўра і 200 брунейскіх сен — 70.240 еўра ў эквіваленце.
Па выніках праверкі аўтобус МАЗ арыштаваны. Кіроўца быў дапытаны і ўзяты пад варту.
З пачатку 2024 года аб’ём кантрабанды цыгарэт, перахопленых літоўскімі памежнікамі, паменшыўся амаль у два разы, паведамляла ў чэрвені Служба аховы дзяржаўнай мяжы гэтай балтыйскай дзяржавы.
Зніжэнне паказчыкаў адбылося ў асноўным дзякуючы ўстаноўцы загароды і сістэм назірання на мяжы з Беларуссю, а таксама закрыццю часткі пунктаў пропуску.
У выніку, як заяўлялася, “кантрабандысты ўсё часцей спрабуюць пераправіць кантрабандныя цыгарэты з Беларусі па паветры”.
“Са студзеня да траўня гэтага года памежнікі перахапілі больш за 587 тыс. пачкаў цыгарэт. У 2023 годзе за той жа перыяд гэты паказчык склаў больш за 1.1 млн пачкаў цыгарэт”, — удакладнілі ў ведамстве.
