“Вясна”: За апошнія тры дні статус палітвязня атрымала больш людзей, чым выйдуць па памілаванні
Наваполацкая папраўчая калонія № 1, адна са шматлікіх, дзе ўтрымліваюцца палітвязні
24 жніўня, Позірк. За апошнія тры дні — 21, 22 і 23 жніўня — статус палітвязня атрымала больш людзей, чым выйдуць па памілаванні, паведамляе праваабарончы цэнтр “Вясна”.
16 жніўня Аляксандр Лукашэнка падпісаў указ аб памілаванні 30 палітзняволеных, сярод якіх 14 жанчын і 16 мужчын, некаторыя з іх маюць сур’ёзныя захворванні. На 24 жніўня “Вясне” вядомыя прозвішчы 19 вызваленых, 13 з якіх жанчыны.
Праваабаронцы, паводле іх слоў, падтрымліваюць інфармацыйную цішыню для бяспекі былых вязняў, таму пакуль публікуюць прозвішчы толькі некаторых вызваленых: Васіль Бераснеў, Ала Зуева, Вольга Стаброўская, Вольга Новікава, Ірына Санкоўская, Яўген Чуміла, Ксенія Луцкіна.
Тры дні запар праваабарончая супольнасць Беларусі прымала заявы аб наданні новым фігурантам палітычных крымінальных спраў статуса палітвязня: 21 жніўня яго атрымалі 10 чалавек, 22-га — 14 (удакладненая лічба, раней было 15; са спісу, як стала вядома “Позірку”, на просьбу сваякоў пакуль прыбралі былога дырэктара стартап-хаба Imaguru Яўгена Пугача, які чакае суда), 23-га — 7.
Агулам на 24 жніўня ў краіне 1.377 чалавек, якіх праваабарончая супольнасць прызнае палітычнымі зняволенымі.
